တန င်္သာရီတိုင်းဒေသကြီး ကော့သောင်း မြို့မှ ၃၁မိုင်ဝေးသည့် ဆီအုန်းခြံ တစ်ခြံတွင် တူးဖော်ရရှိသည့်ရှေး ဟောင်းပုတီးစေ့များနှင့် အသုံး အဆောင်ပစ္စည်းများကို ထိုင်းနှင့် မလေးရှားနိုင်ငံများမှ ဝယ်ယူကြ ကြောင်း ကော့သောင်းမြို့ရှိရှေး ဟောင်းပစ္စည်းအရောင်းဆိုင်များ နှင့် ပုတီးစေ့တူးဖော်နေသူများ ထံမှ သိရသည်။
ယင်းရှေးဟောင်းပစ္စည်း များကို လွန်ခဲ့သည့်သုံးနှစ်ခန့်က တည်းက တူးဖော်ရရှိနေပြီး အဆင်း မျိုးစုံ၊ သဏ္ဌာန်မျိုးစုံ၊ အရွယ်မျိုးစုံ ရှိသည့်ပုတီးစေ့များကို ရှေးဟောင်း ပစ္စည်းအရောင်းဆိုင်များတွင် ပြန် လည်ရောင်းချကြကြောင်း တူးဖော် သူများက ပြောသည်။
''ဆီအုန်းစိုက်ဖို့ မြေတူးတော့ အိုးကွဲစတွေပေါ်လာလို့ ဆက်တူး ရာက စတွေ့တာ။ ရှေးဟောင်း ပစ္စည်းဆိုင်မှာသွားပြတော့ ရှေး ဟောင်းလက်ရာ၊ တန်ဖိုးရှိတယ်လို့ ပြောပြီး ဝယ်ယူလာတော့ တူးတဲ့ သူတွေများလာတယ်''ဟု မလိဝမ်း ကျေးရွာသား ဦးစိုးက ပြောသည်။
ပန်းအိုး၊ ကွမ်းအစ် စသည့် အသုံးအဆောင်ပစ္စည်းများကိုတူးဖော်ရရှိပြီး တချို့ကံကောင်း သူများသည် ရွှေစရွှေလုံးကလေး များရသည်ဟု တူးဖော်နေသူများ က ပြောသည်။
ယင်းသို့ပစ္စည်းလာရောက် တူးဖော်သူများသည် ဆီအုန်းခြံလုပ် သားများနှင့် အနီးအနားကျေးရွာ မှဒေသခံများဖြစ်သည်။ နောက် ပိုင်းတွင် ယင်းပစ္စည်းများကိုဝယ် ယူသည့် အဝယ်ဒိုင်များရှိလာကာ ဝယ်ယူသူအများစုသည် ပသျှူး လူမျိုးများဖြစ်ပြီး ထိုင်းနှင့် မလေး ရှားသို့ ပြန်လည်ရောင်းချသည်ဟု တူးဖော်သူများက ပြောသည်။
လက်ရှိတွင် ပုတီးစေ့တူးဖော် သူ တဖြည်းဖြည်းများလာပြီး တချို့နေရာများတွင် လူတစ်ရပ် ကျော်ခန့်အထိနက်ကာ ဆီအုန်း ပင်များ လဲကျသည်မျိုးရှိကြောင်း ယင်းဆီအုန်းခြံအတွင်းတွင် တူး ဖော်နေသည့် အမျိုးသမီးတစ်ဦး က ရှင်းပြသည်။
''လာတူးတယ်ဆိုပေမယ့် တစ်နေ့လုံးတူးလို့ တစ်လုံးမှမရ တာလဲရှိတယ်။ ရရင်လဲ ဈေးဖိုး လေး ဘာလေးကာမိအောင်လို့ အားတဲ့အချိန်လေး လာတူးတာ ပါ။ ဆီအုန်းပင်တွေ ပျက်စီးလို့ဆို ပြီး ဆီအုန်းခြံက မန်နေဂျာနဲ့စစ် တပ်က လာဖမ်းတာ၊ ခြောက်လှန့် တာမျိုးတော့ရှိတယ်။ ဒါပေမဲ့ သူ တို့ပြန်သွားရင် တူးမယ့်သူတွေပြန် ရောက်လာတာပဲ''ဟု အထက်ပါ အမျိုးသမီးကဆိုသည်။
တူးဖော်ရရှိသည့်ပုတီးစေ့ များကို ဆွဲကြိုးအဖြစ်သီပြီး ရှေး ဟောင်းပစ္စည်း အရောင်းဆိုင်များ ကိုရောင်းချရာ တစ်ကုံးလျှင် ထိုင်း ဘတ်ငွေသုံးထောင်မှ ခုနစ်ထောင် ကျော်အထိဈေးရှိကာ ပုတီးစေ့ အရွယ်အစားအလိုက် ဈေးနှုန်း အမျိုးမျိုးသတ်မှတ်ကာ ဝယ်ယူ ကြောင်း၊ ထိုင်းထက် မလေးရှား ကပိုဝယ်ကြောင်း ကော့သောင်း မြို့ အဏ္ဏဝါရပ်ကွက်ရှိ ရှေးဟောင်း ပစ္စည်းအရောင်းဆိုင်များထံမှ သိရသည်။
ယင်းဆီအုန်းခြံအပါအဝင် အော်ကြီးကျေးရွာရှိ ဥယျာဉ်ခြံ တစ်ခြံတွင် တူးဖော်တွေ့ရှိသော် လည်း ခြံရှင်ကတူးခွင့်မပြုဘဲ ပိတ် ထားကြောင်း၊ တခြားတူးဖော်တွေ့ ရှိသည့်နေရာများတွင် မတူးဖော် ရန် စစ်တပ်မှတားမြစ်ထားကြောင်း ဆီအုန်းခြံအလုပ်သမားများက ပြောသည်။
Yangon Media Group
0 comments:
Post a Comment