သူငယ်ချင်းရေ..
မင်းတို့ မိသားစု နေကောင်းကြတယ် မို့လား...။ သားတွေ သမီးတွေလည်း တော်တော်ကြီးရောပေါ့။ မင်းနဲ့ မတူဘဲ အမေ တူရင်တော့ အချောလေး တွေ နေမှာ :D ကားတွေသွင်းပြီး အလုပ်အကိုင်လည်း အဆင်ပြေနေတယ် ကြားရတာ ၀မ်းသာတယ်ကွာ။ မန်းမှာနေတဲ့မင်း ကားတွေသွင်းပြီး ရောင်းနေတယ် ဆိုတော့ ရန်ကုန်-မန်း အခေါက်ခေါက် အခါခါ ကားမောင်းနေရမှာဘဲ။
မောင်းတာတော့ သတိထားကွာ။ ဟိုတလောကဘဲ ခရီးသည်တင်ကား တစီး မှောက်လို့ လူ ၁၁ ယောက်လောက် သေသွားတာ ကြားရတာ စိတ်မကောင်းစရာဘဲကွ။ အခုတခါ အိမ်စီးကား ၂ စီး အိပ်ငိုက်ပြီး ကျော်တက်ရင်း တိုက်လို့ လူတွေ ထပ်သေပြန်ပြီ လို့ ကြားရတယ်။ ကိုယ့် မိဘ၊ ဆွေမျိုး သားချင်း၊ ခင်မင် ရင်းနှီးရတဲ့ မိတ်ဆွေ တယောက်ယောက် ဆိုတာမျိုး ကိုယ်ချင်းစာပြီး တွေးကြည့်ရင် one is too many ဘဲလေ။
လမ်းခင်းခဲ့တဲ့ အင်ဂျင်နီယာတွေရော၊ မောင်းတဲ့သူ ကိုယ်တိုင်ရော၊ ကားပေါ်လိုက်စီးတဲ့ ခရီးသည်တွေရော၊ ကား ပိုင်ရှင်တွေရော၊ ဌာနဆိုင်ရာ အာဏာပိုင်တွေရော အားလုံးကတော့ အက်စီးဒင့် ဖြစ်ပါစေ ဆိုတဲ့ ဆန္ဒ ရှိမှာ မဟုတ်ဘူး ဆိုတာတော့ သေချာတယ်ကွ…
ဖြစ်စေချင်တဲ့ ဆန္ဒ မရှိပေမဲ့ ဖြစ်တာတော့ ဖြစ်နေတာဘဲလေ။ အဲဒီတော့ ဒီ အက်စီးဒင့်တွေ ဘယ်လို လျှော့ချနိုင်မလဲ ဆိုတာ အပြစ်တင်နေတယ် လို့ မမြင်ဘဲ ဘယ်နေရာတွေ ချို့ယွင်းနေသလဲ ဘက်ပေါင်းစုံက စဉ်းစားဖို့ လိုမယ် လို့ ငါထင်တယ်ကွ။ Experience is simply the name we give our mistakes ဆိုတဲ့ စကား တောင် ရှိသေးတယ် မလား။ Civil engineer တယောက် အနေနဲ့ရော၊ UK full-licensed driver အနေနဲ့ရော၊ မြင်ဘူး တွေ့ဘူး တဲ့ စနစ်တွေကို အမြင်မျှဝေ ဖို့ ရည်ရွယ်ချက်နဲ့ပါ။
လူ တယောက် လမ်းမပေါ် ကားမောင်းပြီး accident ဖြစ်တာ လူ၊ လမ်း၊ ကား ဒီ ၃ ခု ထဲ က တခုခု ချို့ယွင်းလို့ဘဲကွ.... (မရှိမဲ့ ရှိမဲ့ မုတ်ဆိတ်မွေး ပွတ်.. ဆရာကြီး အထာ နဲ့ ပြောတယ် လို့ စိတ်ထဲမှာ မြင်ပြီး ဖတ်...) ငါ့ကောင် ရ... ဒီ ၃ ခု မဟုတ်လို့ ဘာဖြစ်စရာ ရှိသေးလို့လဲ မပြောနဲ့အုံး... အဓိပ္ပါယ်မရှိတဲ့ ကားပေါ်မှာ လိုက်လာတယ် တို့ …. သရဲမ လမ်းလည်ခေါင် ရပ်ပြီး ကားတားတယ်တို့… လမ်းစားတယ်တို့ ဆိုတာတွေ တို့ဆီမှာ ခေတ်စားလွန်းလို့ပါ။
ပထမဆုံး လူပြောများနေတဲ့ လမ်း အကြောင်း ပြောကြဆိုကြတာတွေ စုလိုက်တော့ ဒါတွေ တွေ့တယ်ကွ။
ကွန်ကရစ်လမ်း
မင်းသိတဲ့ အတိုင်း တော်တော် hot သွားတဲ့ ခေါင်းစဉ်ဘဲကွ…။ ကားလမ်း (pavement) ကို အခြေခံ အနေနဲ့ Flexible (အရင်က ဒို့သိတဲ့ ကျောက်စီပြီးခင်းတဲ့ ကတ္တရာလမ်း) နဲ့ Rigid (ကွန်ကရစ် အမာ အချပ်လိုက်) ၂ မျိုး ခွဲလို့ရတယ်။ ၂ မျိုး ရောသုံးတာပါ ထပ်ခွဲရင် Flexible, Flexible Composite နဲ့ Rigid, Rigid Composite ဆိုပြီး ၄ မျိုး ခွဲနိုင်တယ်ပေါ့ကွာ။ သိပ်ရှုပ်သွားမှာစိုးလို့ ဒီမှာ အကျယ် မပြောတော့ဘူး။ နည်းနည်း ပို သိချင်သေးရင်တော့ အနှစ်ချုပ်လေးတွေ http://www.dur.ac.uk/~des0www4/cal/roads/pavdes/pavedes.html မှာ ဖတ်ကြည့်။ ပုံလေး တွေ ထပ်ကြည့်ချင်သေးရင် အခုခေတ်ပေါ် အလွယ်ဆုံးနည်း ဖြစ်တဲ့ Googling လုပ်ကြည့်ပေါ့ကွာ :P
အတိုချုပ်ပြောရင်ကွာ ကွန်ကရစ် လမ်း ခင်းတာ သူ့ specification အတိုင်း လုပ်ရင် ဘာပြသနာမှ မရှိဘူး။ UK မှာတော့ ကွန်ကရစ်လမ်းကို Motorway တွေ အတွက် သုံးလို့ရတယ်။ ဒါပေမဲ့ UK က official design guide [http://www.dft.gov.uk/ha/standards/dmrb/] အရတော့ အပေါ်မှာ ကတ္တရာ တလွှာ ထပ်အုပ်ရမယ် လို့ သတ်မှတ်ထားတယ်။ အပေါ်လင့်က ပြောသလို ဆို Rigid composite လို့ ခေါ်မလား။ အခုတော့ အမြန်လမ်းကြီးလည်း တချို့နေရာတွေ ကတ္တရာ စအုပ်နေတာ တွေ့ခဲ့တယ်ကွ။
ကတ္တရာလမ်း (Flexible pavement) ကောင်းတယ်၊ ကွန်ကရစ် (Rigid Pavement) ကောင်းတယ် ငြင်းမှာ စိုးလို့လား တော့ မသိဘူးကွ ဒို့ ပျဉ်မနား ကနေ နေပြည်တော် မြို့တော်ခန်းမ ဘက်ထွက်တဲ့ လမ်းက ပထမခင်းထားတဲ့ ကတ္တရာလမ်းကို ဘေးက ကွန်ကရစ်လမ်း ၂ဘက် ညှပ်ပြီး Sandwich ခင်းပြစ်တာဟေ့... လန်းချက် :P
Banking angle
အကွေ့မှာ လုပ်ပေးရတဲ့ လမ်းအစောင်း မမှန်ဘူး ထင်တယ်ကွ။ ကားရဲ့ speed နဲ့ အကွေ့မှာ ဖြစ်လာတဲ့ centrifugal force ကို ပြန်ချေဖို့ elevation စောင်းပြီး friction force ကို ဖန်တီးပေးရတာပေါ့။ အဲဒါနဲ့ ပတ်သက်လို့ http://blog.mechguru.com/heat-treatment/how-to-calculate-banking-angle-of-road/ မှာ ရှင်းထားတာလေး မဆိုးဘူးကွ။ ဒါတွေက undergrad လောက်မှာ သင်ရတာတွေပါ။ မသိလို့ မဟုတ်လောက်ဘူး။ Detailing နဲ့ QC အားနည်းခဲ့လို့ လို့ ထင်တယ်။ မင်းသိတဲ့ အတိုင်း ဒို့လူမျိုးက ဒီလောက်ဆို ရပါပြီကွာ ဆိုတာက အများသား မလား... ငါရောဘဲ ကွ .. ဟဲ. ဟဲ… ဒီမှာတောင် လစ်ရင် လစ်သလို တွယ်လိုက်တာ..။
Tiredness/ Fatigue
လမ်း ဒီဇိုင်းမှာလည်း လုံးလုံးကြီး အဖြောင့်မဟုတ်ဘဲ Curvilinear (ခပ်ကွေးကွေး) လုပ်တာ tiredness/ fatigue (ငြီးငွေ့ပြီး ငိုက်တာမျိုး) လျှော့ပေးနိုင်တယ် ဆိုတယ်။ နောက် လမ်းဘေးမြင်ရတဲ့ မြင်ကွင်း အပြောင်းအလဲ ရှိနေအောင် ဖန်တီးပေးရတယ်တဲ့။ မြင်နေကြ ဟာကြီး ဘဲ အကြာကြီး မြင်ရတော့ ရိုးသွားပြီး ငိုက်သွားတာပေါ့ကွာ.. (အိမ်က ဟာကြီး တော့ မရိုးစေနဲ့ကွ... အဲဒါ ကွိုင်ရှိတယ် :P) ဆိုလိုတာက ကားမောင်းတဲ့သူ ရဲ့ မျက်စိထဲ မြင်နေရမဲ့ လမ်းဘေး က တောတွေ တောင်တွေ၊ landscaping တွေ ရဲ့ view ကိုလည်း သတိထားဖို့ ပြောကြတာပါ။
ဒီလမ်းကြီးပေါ် ခရီးရှည် ဆက်တိုက်မောင်းရတော့ လူတိုင်း အိပ်ငိုက်လာတာ မဆန်းဘူးပေါ့ကွာ။ ဒီဘက်က အစိုးရ highway agency ကတော့ ပိုပြီး သတိထားမိအောင် ဆောင်ရန် ရှောင်ရန်တွေ ပညာပေးတာ လုပ်ပေးထားတာ ရှိတယ်။ မမောင်းခင် ညမှာ အိပ်ရေးမပျက်အောင်၊ ညကထဲက အရက် ဘီယာ ရှောင်သင့်တာ၊ ၂နာရီ လောက် မောင်းပြီး ၁၀ မိနစ်လောက် ခဏတဖြုတ် နားနားပေးရတာတို့ (နားလို့ရအောင်လဲ စီစဉ်ပေးဖို့ လိုတာပေါ့)၊ fresh air ရှု ရတာတို့၊ ည ၁၂ နာရီ နဲ့ မနက် ၄ နာရီ ကြား တတ်နိုင်ရင် မမောင်းဖို့၊ caffeine များများ ပါတဲ့ ကော်ဖီ တို့ ဘာတို့ သောက်တာ လုပ်ပေးရင် အိပ်ငိုက် ပြေတယ်ပေါ့ကွာ။ နောက်ဆုံး လုံးဝ မရရင်တော့ safe ဖြစ်တဲ့ နေရာတခုခုမှာ ခဏ အိပ်ပြစ်တာ အကောင်းဆုံးဘဲ။
Services
မြန်မာလို ဆိုရင်တော့ ယာဉ်ရပ်နားစခန်း ပေါ့။ ဒီမှာတော့ Service လို့ ခေါ်ကြတယ်။ အမြန်လမ်းပေါ်မှာ ၁၁၅ မိုင် နဲ့ ၁၀၅ မိုင် ၂ခု ထဲ ရှိတာတော့ နည်းသလို ဘဲကွ။ တယောက်နဲ့ တယောက် မောင်းလာတဲ့ မိုင်ချင်း၊ ပင်ပန်းတတ်တာချင်း လည်း မတူတော့ နားချင်တဲ့ အချိန် နားလို့ ရအောင် ခပ် စိတ်စိတ်လေး လုပ်ပေးသင့်တယ်။ ဆိုင်တွေ အများကြီး နဲ့ မလုပ်ဘဲ ဆီ ရေ လေ ဖြည့်လို့ရမယ်၊ အရေးပေါ် minor service လုပ်လို့ရမဲ့ ကားဆိုင်လေးတွေရယ်၊ စားသောက်ဆိုင် နည်းနည်း ရယ် ဆိုရင် မောင်းရင်း ပင်ပန်းလာလို့/ ငိုက်လာလို့ ခဏနားချင်တယ် ဆိုလဲ ပေကပ်ပြီး ၁၀၅ မိုင်တို့ ၁၁၅ မိုင်တို့ထိ မောင်းမနေရတော့ဘူးပေါ့။ သွားတဲ့ လာတဲ့သူတွေလည်း အဆင်ပြေ ၊ အမြန်လမ်း တလျောက် အနီးအနား ဒေသ က လူတွေလည်း အလုပ်ရကြတာပေါ့။
အော်.. အေး.. နောက်တခုက မူးရင် မမောင်းနဲ့ မောင်းရင် မမူးနဲ့ ပြောရုံတင်မကဘဲ ဒီလို ယာဉ်ရပ်နား စခန်းတွေမှာ အရက် ဘီယာ ရောင်းတာ ကန့်သတ်သင့်တယ်ကွ။ ငါလို အရက်ပုလင်း မြင်ရင် မနေနိုင်တဲ့သူမျိုးဆို လွယ်လွယ်ကူကူ မရတော့ တော်ရုံ မသောက်ဖြစ်တော့ဘူး ပေါ့ကွာ။
Service ဆိုလို့ ငါတို့ နေပြည်တော်က ငလိုက်ဆည် နားနေစခန်း ဆိုတာ သွားသတိရတယ်ကွ။ အဲဒီ နေရာလေးက ဆည်ဘေးဆိုတော့ swimming area, hotel, restaurant အစုံ နဲ့ တော်တော်မိုက်တယ်။ နေပြည်တော် မြို့တော်ခန်းမ ကနေ မိုင် ၂၀ လောက် ဝေးတယ်…. အမြန်လမ်းမကြီးဘေး ကပ်လျက် ရှိတာ။ ကပ်လျက် ဆိုပေမဲ့ အမြန်လမ်း က လှည့်ဝင်ရင် ၅ မိုင်လောက် ပတ်ရတယ်ကွ။ ကပ်လျက် ကို ၅ မိုင်လောက် ပတ်ဝင် ရတယ် ဆိုလို့ မျက်စိလည်သွားသလား ဟရောင်...။ ဟုတ်တယ် မောင်.. အမြန်လမ်းကနေ ကိုက် ၂၀၀ လောက် ဘဲ ကွာတာကို လမ်းက ၅ မိုင်လောက် ပတ်ဖောက်ထားတာ။ မေးကြည့်တော့ အမြန်လမ်းမ ကြီးက နေ လမ်း ပေး မဖောက်လို့ လို့ ဆိုလား ဘာလား.. ဆောက်လုပ်ရေး နဲ့ ဆည်မြောင်း မတည့်ကြဘူး ထင်တယ်ကွ... ။ ပေးဖောက်ရင်တော့ နားစရာ တခု ရတာပေါ့ကွာ။
Bridges
တံတားတွေက လမ်းထက် ကျဉ်းနေတာ တော့ လုပ်ရင်း ကိုင်ရင်း ဒီဇိုင်းပြောင်းသွားတာတွေ ကြောင့် ဖြစ်ခဲ့မယ် ထင်တယ်ကွ။ မင်းသိတဲ့ အတိုင်းဘဲ အရင်က ဒါဒီလိုလုပ် ဆိုပြီး နှုတ်မိန့်တွေနဲ့ လုပ်ကြရတာ မလား၊ ဒီတခေါက် ဒီလိုလုပ် ဆိုပေမဲ့ နောက်တခေါက်ကျတော့ ဟိုလိုလုပ် ဖြစ်သွားပြန်ရောလေ..။ အဲဒီတော့ မဖြစ်သင့်တဲ့ လမ်းထက် တံတားက ကျဉ်းတာတွေ ဖြစ်ကုန်တာပေါ့ကွာ။ အခုတော့ တံတားတွေ ထပ်ချဲ့ နေတာတော့ တွေ့တယ်။
တံတားတွေ မြင့်နေလို့ ဆိုပြီး တယောက်ပြောထားတာ လဲ တွေ့မိတယ်ကွ။ အဲဒါကို ငါလည်း သတိထားမိတယ်။ ချဉ်းကပ် လမ်း အတိုင်း တက်လာတာ တံတားက မြင့်နေတော့ တံတား ဟိုဘက် ဘာရှိတယ် ဆိုတာကို စောစော ကြို မမြင်ရဘူးကွ။ တံတားပေါ်ရောက်မှ ဗြုန်းကနဲ မြင်ရတော့ ကိုယ်က မြန်ပြီး ရှေ့ကား ကနှေးတာမျိုးတို့၊ အကောင် တကောင် တက်လာတို့ ဘာတို့ တခုခု ဆို ဘရိတ် အုပ်ချိန် မမှီတော့ဘူးကွ။
Stopping distance
ဘရိတ်ဆိုတာ အုပ် အုပ်ချင်း ရပ်တာ မဟုတ်ဘူး ဆိုတာ ကားမောင်းနေတဲ့ မင်းလည်း သိပါတယ်။ stopping distance လို့ ခေါ်တာပေါ့။ ဘရိတ်အုပ်စရာ တခု မြင်လိုက်ပြီ ဆိုတာနဲ့ “စဉ်းစား (thinking distance) +ဘရိတ်အုပ် (breaking distance)” ၂ခု တန်းလုပ်တာတောင် မိုင် ၆၀ နှုန်း နဲ့ သွားနေတဲ့ ကားတစီးက နောက်ထပ် ပေ ၂၄၀ အကွာ ကျမှ ရပ်တယ်ကွ။ မိုင် ၇၀ နှုန်း ဆို ၃၁၅ ပေ ထိ ရောက်တယ်။ အဲဒီတော့ အပေါ်က ပြောတဲ့ တံတားမျိုးမှာ ချဉ်းကပ်လမ်း က တံတား မရောက်ခင် ပျမ်းမျှ ပေ ၃၅၀ လောက် အကွာထိ မြင်ရသင့်တာပေါ့ကွာ။ တံတားမှတင် မဟုတ်ဘူးကွ။ အကွေ့လို့ နေရာမျိုး၊ လမ်းဆုံတွေလို နေရာမျိုး ဘယ်နေရာမှာဘဲ ဖြစ်ဖြစ် ထည့်စဉ်းစားရမဲ့ အကွာအဝေးပေါ့။
အောက်က ပုံမှာ မင်း မြင်တဲ့ အတိုင်းဘဲ.. ပေ တွေ မီတာတွေ ဆိုရင် သိပ် စာတတ်ပေတတ် မဟုတ်တဲ့ ကား ဒရိုင်ဘာတွေ မမှန်းတတ်မှာ ဆိုးလို့ ကားဘယ်နှစ်စီးစာလောက် ရှည်တယ်ဆိုတာပါ ပြောပေးထားတယ်။ မင်းသိတဲ့ အတိုင်းဘဲလေ လခစားနဲ့ ကားမောင်းစားတဲ့ ကား ဒရိုင်ဘာ ဆိုတာ ဘယ်အတိုင်းအတာထိ စာဖတ်ကြမှာလဲ၊ အဓိက က သူတို့ သိသွားဖို့ ဘယ်လို ပညာပေးကြမလဲ စဉ်းစားဖို့ လိုတယ်ကွ။ အခု ငါ့ note တောင် မင်းလို လူသာ ဖတ်တာကွ၊ ရန်ကုန်-မန်ုး express ကားသမား တယောက်မှ ဖတ်မိမှာ မဟုတ်ဘူး။ ဒါတွေလည်း ထည့်စဉ်းစားစရာ တခုပေါ့ကွာ။
Road Signs
အမြန်လမ်းဘေး က တချို့ ဆိုင်းဘုတ်တွေ ငါ့ note လောက် နီးနီး ရှည်တာဟေ့။ ရပ်ပြီး စိန်ပြေနပြေ ဖတ်မှ အကုန် ဖတ်ပြီးမဲ့ သဘောရှိသကွ။ ကီလို ၁၀၀ နဲ့ မောင်းသွားတဲ့ ကားဆရာ ကတော့ ဖတ်နိုင်မယ် မထင်ဘူး။ ဘာသဘော နဲ့ ရေးထားတာလဲ တော့ မသိဘူး။ ဒို့ နိုင်ငံမှာကလည်း လိုက်မမှီတာတွေ အများသားကွ။ မဟုတ်မှ လွဲရော အဘ လာစစ်တုံးက မြင်အောင် ရေးပြထားတာ ထင်တာဘဲ။
ကချော်ကချွတ် sign တွေမှ မဟုတ်ဘူး ကားမောင်းတဲ့သူကို အာရုံလွှဲစေမဲ့ distract ဖြစ်မဲ့ဟာ ဘာမှ မရှိသင့်ဘူးကွ။ လို-တို-ရှင်း message တွေဘဲ ပေးရမှာ။ အမြန်နှုန်း နဲ့ မောင်းနေတဲ့သူတယောက်က speed limit ဆိုတာတောင် မျက်စိ နဲ့ ဖျတ်ကနဲ လှမ်းကြည့်ဖို့လောက် အချိန်ရတာလေ။
နောက်ပြီး sign တွေ ထောင်ထားတဲ့ နေရာတွေကိုလည်း ဂရုစိုက်ဖို့ လိုတယ်ကွ။ ဥပမာ အကွေ့မှာ ဒရိုင်ဘာ အနေနဲ့ ကား နဲ့ အရှိန်ကိုဘဲ ဂရုစိုက်နေရမဲ့ နေရာမှာ အာရုံလွဲစေမဲ့ ဆိုင်းဘုတ်တွေ ပွထ နေအောင် ထောင်ထားတာမျိုးပေါ့ကွာ။ Sign တွေကလည်း international highway codes တွေမှာ သတ်မှတ်ထားတဲ့ အရောင် အရွယ်အစား စတာတွေ အတိုင်း ဖြစ်သင့်တယ်ကွ။
Variable speed limits
ဒီဘက်က လမ်းမကြီးတွေမှာတော့ traffic အနေအထား အရ၊ လမ်း မြေပြင်အနေအထား၊ အကွေ့အကောက် တွေ အရ၊ ဒါမှမဟုတ် လမ်းပြင်တာတွေ ရှိနေတတ်တဲ့ အချိန်အခါ မျိုး လိုက်ပြီး speed limit ကို အပိုင်းလိုက် အပိုင်းလိုက် ပြောင်းပြီးတော့လည်း သတ်မှတ်တတ် ကြတယ်ကွ။ တလမ်းလုံး national speed limit မိုင် ၇၀ ဆိုတာမျိုး မဟုတ်ဘူး။ ဒီ နေရာကတော့ မိုင် ၅၀ ဘဲ သွားသင့်တယ် ထင်ရင် ၅၀၊ ပိုဆိုးတဲ့ နေရာဆို မိုင် ၄၀/ ၃၀။ ကောင်းသွားတဲ့ နေရာ ပြန်ရောက်သွားရင် ၇၀ ဆိုတာမျိုး အနေအထား အလိုက် သတ်မှတ်တယ်။ ဒို့ဆီလဲ တလမ်းလုံး ကီလို ၁၀၀ ဆိုတာမျိုး မဟုတ်ဘဲ စနစ်တကျ ပြန်စစ်ပြီး လျော့သင့်ရင် လျော့ရမဲ့ နေရာလေးတွေ ရှိနိုင်တယ်။
Standards
Speed limit ကျတော့ km နဲ့ ရေးပြီး အကွာအဝေးကျ မိုင်တိုင်တွေ ဆိုတော့ ဒို့နိုင်ငံ official က ကီလိုမီတာ လား မိုင်လား၊ လမ်းလည် ကျွန်း တွေ၊ လမ်း Sign တွေ စနစ်မကျတာ၊ လမ်း sign ထောင်ထားတဲ့ နေရာ မမှန်တာ၊ National highway standards မရှိသေးတာ၊ Barrier တွေ မမှန်တာ စသဖြင့် အသေးစိတ် အကုန် လိုက်ကြည့်မယ် ဆိုရင်တော့ အများကြီးပေါ့ကွာ။
အေးကွာ… နိုင်ငံတကာ အဆင့်မှီဖို့ တော့ ပြန်ပြင်သင့်တာလေးတွေ တော်တော်များများ ရှိတယ်လို့ မြင်တယ်ကွ။ မင်း ဖျတ်ကနဲ ပြုံးသွားတာ ငါ မြင်လိုက်တယ် သယ်ရင်း။ ငါတို့နိုင်ငံ ဒီလောက် ဆင်းရဲတာကို နိုင်ငံတကာ အဆင့် လာမပြောနဲ့ ဦး လေကွာ လို့ မင်းပြောချင်တာ မို့လား။ နိုင်ငံတကာ အဆင့်မှီ ကားတွေကို နိုင်ငံတကာ speed နဲ့ မောင်းမယ် ဆိုရင် နိုင်ငံတကာ အဆင့်မှီတဲ့ လမ်း ဖြစ်ဖို့လိုတယ် ဆိုရင်တော့ မင်း ငြင်းမယ် မထင်ဘူး။ မဟုတ်ရင်တော့ နိုင်ငံတကာ အဆင့်မှီ မီးသဂြိုလ်စက်ကြီး တည်ရလိမ့်မယ်။
မင်းတို့ ငါတို့တွေ တစိတ်ရှိ အမြန်လမ်း အမြန်လမ်း အော်နေလို့ ဒို့ဘကြီး က အန်ကယ်ဆမ် ကို သွား အကူအညီ တောင်း လာတယ် ကြားတယ်ကွ။ အန်ကယ်ဆမ်ကြီး လာပြီး စနစ်တကျ လုပ်သွားရင်တော့ မင်းတို့ ငါတို့ အမြန်လမ်းမကြီး ကို လက်ညှိုးထိုး လို့ မရတော့ဘူး ပေါ့ကွာ။ ငှင်းငှင်းငှင်း (ဝန်ကြီး ဦးစိုးသိန်း WEF မှာ ရီတဲ့ပုံစံ နဲ့ ဖတ်ကွာ။ စကားမစပ် ငါတော့ ဘွင်းဘွင်းကြီး ပြောတတ်တဲ့ အဲဒီ လူကြီးကို နည်းနည်းတော့ သဘောကျသကွ။)
အဲဒီလို လမ်း ကောင်းသွားပြီ ဆိုရင်တော့ တခြား factor တွေက လူ နဲ့ ကားကွ။ လူတွေ အိပ်ငိုက်လို့၊ စည်းမဲ့ ကမ်းမဲ့ မောင်းလို့၊ သတ်မှတ်မိုင်ထက် ကျော်မောင်းလို့၊ ကားကြံ့ခိုင်မှု အားနည်းလို့ ဘာလို့ ညာလို့တွေ လာပြီ။ ဒါ ကားသမား နဲ့ ကားပိုင်ရှင် တွေမှာချည်းဘဲ တာဝန် ရှိသလား..၊ တခြား ဘယ်သူတွေမှာ တာဝန် ရှိသေးလဲ၊ ဘယ်လို လျော့ချနိုင်မလဲ..၊ ငါတို့ ထက် ကား အစီးရေ အဆ ၅၀ လောက်များတဲ့ UK မှာ ဘယ်လိုတွေ လုပ်ထားလဲ ဆိုတာနဲ့ ချိန်ထိုး စဉ်းစားကြည့်မိတယ်ကွ…။
ငါစာရေးပျင်းတာလဲ မင်းသိသလို မင်းလဲ စာရှည်ရှည် မဖတ်ချင်တာလည်း ငါသိတယ်ကွ ဟဲဟဲ….။ လူ နဲ့ ကားအကြောင်း နောက်တပိုင်းမှ ဆက်ပြောတာပေါ့ကွာ။
0 comments:
Post a Comment