ပြည်ထောင်စု အစိုးရအနေဖြင့် လယ်ယာမြေ ပြဿနာများကို အမြန်ဆုံး ဖြေရှင်း၍ လုပ်ဆောင်ချက်များကို ပြည်ထောင်စု လွှတ်တော်သို့ နှစ်လတစ်ကြိမ် တင်ပြရမည်

သြဂုတ် ၁၆ ရက်တွင် ပြုလုပ်သည့် ပြည်ထောင်စု လွှတ်တော် အစည်းအဝေး

ပြည်ထောင်စု အစိုးရအနေဖြင့် လယ်ယာမြေ ပြဿနာများကို အမြန်ဆုံး ဖြေရှင်း၍ လုပ်ဆောင်ချက်များကို ပြည်ထောင်စု လွှတ်တော်သို့ နှစ်လတစ်ကြိမ် တင်ပြရမည် ဖြစ်ကြောင်း သြဂုတ် ၁၆ ရက်က ကျင်းပသည့် ပြည်ထောင်စု လွှတ်တော် အစည်းအဝေးတွင် အတည်ပြု ဆုံးဖြတ်ခဲ့သည်။

လယ်ယာမြေနှင့် အခြားမြေများ သိမ်းဆည်းခံရမှုကြောင့် ပြည်သူများ နစ်နာမှု မရှိစေရေးအတွက် စုံစမ်းရေး ကော်မရှင် အစီရင်ခံစာကို ပြည်ထောင်စု လွှတ်တော်သို့ တင်သွင်းပြီးနောက် ပြည်ထောင်စု လွှတ်တော်၏ အတည်ပြုချက် ရယူရာတွင် ယခုဆုံးဖြတ်ချက်ကို ထည့်သွင်း အတည်ပြုခဲ့ခြင်း ဖြစ်သည်။

ပြည်ထောင်စု လွှတ်တော်နာယက သူရဦးရွှေမန်းက''စုံစမ်းစစ်ဆေးရေး အစီအရင်ခံစာအပေါ် ပြည်ထောင်စု အစိုးရ အုပ်ချုပ်ရေးအဖွဲ့နှင့် တိုင်းဒေသကြီးနှင့် ပြည်နယ်အစိုးရတို့မှ ယခုကိစ္စအား အလေးအနက် ထားရှိကာ ဥပဒေနှင့်အညီ တရားမျှတစွာဖြင့် အလျင်အမြန် ဖြေရှင်းဆောင်ရွက်ပါရန် ဆိုတဲ့နေရာမှာ (အခင်းဖြစ် ကိစ္စရပ်များအတွက် ပြည့်စုံသော၊ မှန်ကန်သော၊ အရည်အချင်းရှိသော သက်သေခံ ချက်များဖြင့်) နှင့် နှစ်လတစ်ကြိမ် အနည်းဆုံး ထားရှိကာ ဤကိစ္စရပ်များ အတွက် ဖြေရှင်းဆောင်ရွက် ပေးနေမှုများကို လွှတ်တော်များသို့ ရှင်းလင်းတင်ပြရန် တိုက်တွန်း လိုပါတယ်'' ဟု ပြောကြားခဲ့သည်။

ဆက်လက်၍ ''ဒါ့ကြောင့် လယ်ယာမြေနှင့် အခြားမြေများ သိမ်းဆည်းခံရမှုများကြောင့် ပြည်သူများ နစ်နာမှု မရှိစေရေးအတွက် စုံစမ်းရေး ကော်မရှင်ရဲ့ အစီရင်ခံစာ အပိုင်း ၃ နှင့် ယင်းအစီရင်ခံစာပါ သုံးသပ် အကြံပြုချက်များကို အုပ်ချုပ်ရေးဆိုင်ရာ အဖွဲ့အစည်း အဆင့်ဆင့်က ဒီနေရာမှာ ဒီနေ့ ကျယ်ကျယ်ပြန့်ပြန့် တင်ပြထားတာ ရှိပါတယ်။ ဒီကိစ္စကို ပြည်ထောင်စု အစိုးရသက်သက်က ဆောင်ရွက်နိုင်ခြင်း မရှိဘဲနဲ့ သက်ဆိုင်ရာ တိုင်းဒေသကြီးနဲ့ ပြည်နယ်အစိုးရ အဖွဲ့များက ဖြေရှင်းဆောင်ရွက် ပေးရမှာ ဖြစ်တဲ့အတွက် ဒီနေ့ ပြည်ထောင်စု လွှတ်တော်က ဆုံးဖြတ်တဲ့ ဆုံးဖြတ်ချက်ထဲမှာ ပြည်ထောင်စု အစိုးရ (အုပ်ချုပ်ရေး) နဲ့ ပြည်နယ်နဲ့တိုင်း အစိုးရ ဆိုသည်မှာ ဥပဒေပြုရေး၊ တရားစီရင်ရေး၊ အုပ်ချုပ်ရေး ကဏ္ဍများအတွက် ထည့်သွင်းဖော်ပြ ထားတာရှိပါတယ်'' ဟု ပြောကြားခဲ့သည်။

''မြေယာ မှုခင်းများဟာ နိုင်ငံတစ်ဝန်း ဖြစ်ပေါ်ခဲ့သော ကိစ္စရပ်များ ဖြစ်ပါတယ်။ ထိုကိစ္စအတွက် အုပ်ချုပ်ရေး အဖွဲ့အစည်းများ၊ ပြည်ထောင်စုနှင့် တိုင်းဒေသကြီး ပြည်နယ် အစိုးရအဖွဲ့များမှ ဖြေရှင်းဆောင်ရွက် ပေးရမှာ ဖြစ်ပါတယ်။ လိုအပ်ပါက လိုအပ်တဲ့ အချိန်မှာ တရားရုံး အဆင့်ဆင့်ကပင် ဆုံးဖြတ်ဆောင်ရွက် ပေးရမှာ ဖြစ်ပါတယ်။ သို့ဖြစ်ပါ၍ ပြည်ထောင်စု လွှတ်တော် ကိုယ်စားလှယ်များသို့ လည်းကောင်း၊ ကော်မတီ၊ ကော်မရှင် အသီးသီးသို့ လည်းကောင်း၊ မြေယာကိစ္စနှင့် ပတ်သက်၍ တိုင်ကြားစာ၊ အသနားခံစာများ ရှိပါက ပြည်ထောင်စု အစိုးရမှတစ်ဆင့် တိုင်းဒေသကြီးနဲ့ ပြည်နယ်များသို့ လွှဲပို့ပေးရန် လိုအပ်ကြောင်း တွေ့ရှိရပါတယ်။ ထိုမှုခင်း ကိစ္စရပ်များကို ပြည်ထောင်စု အစိုးရ အုပ်ချုပ်ရေး အဖွဲ့အစည်းများနှင့် တိုင်းဒေသကြီးနဲ့ ပြည်နယ်အစိုးရတို့မှ တာဝန်ယူ ဖြေရှင်းဆောင်ရွက်ရန်ကို ပြည်ထောင်စု လွှတ်တော်က ထပ်ဆင့်ပြီး သဘောတူညီဖို့ လိုအပ်ပါတယ်'' ဟု ဦးရွှေမန်းက ထည့်သွင်း ပြောကြားခဲ့သည်။

ထို့နောက် လယ်ယာမြေ ပြဿနာများကို ဖြေရှင်း၍ လုပ်ဆောင်ချက်များကို ပြည်ထောင်စု လွှတ်တော်သို့ တင်ပြရန် အဆိုကို လွှတ်တော်က အတည်ပြုခဲ့သည်။

အုပ်ချုပ်ရေးပိုင်းနှင့် လွှတ်တော်တို့၏ ဦးတည်ချက်များသည် နိုင်ငံတော်နှင့် နိုင်ငံသားများ အကျိုးစီးပွားကိုသာ ဦးတည်ကြောင်း၊ လွှတ်တော်မှ တိုက်တွန်းသော အဆိုများကို အုပ်ချုပ်ရေး အဖွဲ့က ဖွဲ့စည်းပုံ အခြေခံ ဥပဒေ ပုဒ်မ ၂၂၈ ပုဒ်မခွဲ (က) အရ လိုက်နာဆောင်ရွက် ရမည်ဖြစ်ကြောင်း ပြည်ထောင်စု လွှတ်တော်နာယက သူရဦးရွှေမန်းက သတင်းထောက်များကို သြဂုတ် ၁၆ ရက်တွင် ပြောကြားခဲ့သည်။

Eleven

Posted in: ပြည်တွင်းသတင်း