အဆိုပါ အစိမ်းရောင်ဗျူဟာစီမံကိန်းမှာ ၂၀၁၁-၂၀၁၂ခုနှစ်အတွင်းမှ စတင်လုပ်ဆောင်ခဲ့ခြင်းဖြစ်ပြီး စီမံကိန်းကာလမှာ (၁၀)နှစ်ဖြစ်ကြောင်း၊ နိုင်ငံခြားသို့တင်ပို့သမျှ တောတောင်သယံဇာတ ကုန်ပစ္စည်းများအပေါ်တွင် နိုင်ငံတော်မှ စုစု ပေါင်း အခွန်ငွေ ၃၄ရာနှုန်းရရှိကြောင်း သိရှိရသည်။
“ နမ့်ခမ်းမှာရှိနေတဲ့ ထုံးကျောက်ထုတ်လုပ်ငန်းတွေက တရားဝင်လုပ်ပိုင်ခွင့်ရရှိထားတာတွေပါ၊ အစိမ်းရောင်ဗျူဟာ စီမံကိန်းက ဧက၉၀၀ကျော် ပါဝင်ပါတယ်။ နမ့်ခမ်းနဲ့ ကွတ်ခိုင်မြို့နယ်မှာ ၁၀နှစ်တာ ထုတ်လုပ်ခွင့် ကျထားပါတယ်” ဟု ရှမ်းပြည်နယ် သစ်တောနှင့်သတ္တုတွင်းဝန်ကြီး ဦးစိုင်းအိုက်ပေါင်းက ပြောသည်။
နိုင်ငံတော်အနေနဲ့ သစ်တောသယံဇာတပြုန်းတီးမှုများမှ ကာကွယ်ရန် လာမည့်နှစ်မှ၍ ရှမ်းပြည်နယ်အတွင်း တစ်နှစ် လျှင် ကျွန်းသစ် တန်ငါးသောင်းကျော်နှင့် သစ်မာခြောက်သောင်းကျော် စုစုပေါင်းတန်တစ်သိန်းကျော်သာ ထုတ်လုပ်မည်ဖြစ်၍ ယမန်နှစ်ထုတ်လုပ်မှုထက် သုံးပုံတစ်ပုံလျော့ချထုတ်လုပ်သွားရန် စီစဉ်ထားကြောင်း သိရှိရသည်။
နမ့်ခမ်းမြို့နယ်အတွင်းရှိ နမ့်ထွန် ထုံးကျောက်တောင်နှင့် အခြားတောင်စွယ်တောင်တန်းများ ကျောက်ထုတ်လုပ်ရေး လုပ်ငန်းများ၊ သတ္တုတူးဖော်ရေးလုပ်ငန်းများ လုပ်ကိုင်နေမှုနှင့်ပတ်သက်၍ နမ့်ခမ်းဒေသခံတစ်ဦးက ယခုကဲ့သို့ ဆိုသည်။
“ တရုတ်ကို တင်သွားတဲ့ ထုံးကျောက်တုံးကြီးတွေက ဘယ်လောက်ကြီးသလဲဆိုရင် အချို့ဆို ကားတစ်စီးကို တစ်တုံး၊ နှစ်တုံးလောက်ပဲ တင်လို့ရတယ်။ ကျောက်ထုတ်လုပ်ရေးလုပ်ငန်းတွေ၊ သတ္တုတူးဖော်ရေးလုပ်ငန်းတွေ အမြောက်အမြား လုပ်ကိုင်နေလို့လည်း သဘာဝသယံဇာတတွေ ပြုန်းတီးရတယ်။ နောက်ပြီး ဒီဒေသက မီးသွေးကို တရုတ်ပြည်ကို အဓိက ထားပြီးတင်ပို့နေတာဆိုတော့ တရုတ်ကို တစ်နေ့တစ်နေ့ ဘာတွေထွက်နေလဲဆိုတာ အကုန်သိရတယ်” ဟု နမ့်ခမ်းဒေသခံတစ်ဦးက ပြောသည်။
တရုတ်ပြည်သို့ အနိမ့်ဆုံးတစ်နေ့လျှင် မီးသွေးကားအစီး၂၀ကျော် ထွက်ရှိနေပြီး သစ်လုံးကား အနည်းဆုံး၁၀စီး ပျမ်းမျှ ထွက်ရှိနေသည်ဟု ရှမ်းပြည်နယ်နှင့်ကချင်ပြည်နယ် နယ်စပ်ဒေသနေ ပြည်သူများထံမှ သိရှိရသည်။
ကွတ်ခိုင်ဒေသခံပြည်သူများအနေဖြင့် အစိမ်းရောင်ဗျူဟာစီမံကိန်းမှ ထုတ်လုပ်နေသည်ကို မသိရှိကြသော်လည်း ကွတ်ခိုင်မြို့နယ်အတွင်းရှိ မြေလွတ်မြေရိုင်းများပေါ်၌ ဧကခြောက်သိန်းဇီဝလောင်စာထုတ်လုပ်ရေး သစ်ပင်စိုက်ပျိုးမည့် စီမံကိန်းကို ဒေသခံများအနေဖြင့် နိုင်ငံတော်သမ္မတအပါအ၀င်၊ ပြည်သူ့လွှတ်တော်ဥက္ကဋ္ဌ၊ အမျိုးသားလွှတ်တော် ဥက္ကဋ္ဌနှင့် ပြည်ထောင်စုလွှတ်တော်နာယကထံသို့ ကန့်ကွက်စာရေးသားပေးပို့ ထားသည်ဟု သိရှိရသည်။
မြစ်မခ
0 comments:
Post a Comment