ကလေးမြို့နယ်၊ သာယာဝတီရွာတွင် ဖွင့်လှစ်ထားသော အစိုးရ နည်းပညာအထက်တန်းမှအောင်မြင်သော ကျောင်းသူ၊ ကျောင်းသားများသည် ယခုနှစ်တွင် နည်းပညာတက္ကသိုလ်(ကလေးမြို့)၌ တက်ရောက်ခွင့် မရရှိတော့ကြောင်း သိရသည်။
" အစိုးရနည်းပညာအထက်တန်းကျောင်းအောင်တဲ့ကျောင်းသူ၊ကျောင်းသားတွေအနေနဲ့နည်းပညာတက္ကသိုလ်ကို တိုက်ရိုက် တက်ခွင့်မပေးတော့တာပါ။ ကလေးမြို့မှာ နည်းပညာ တက္ကသိုလ် အဆင့်တိုးမြင့်ထားပြီးဖြစ်ပါတယ်။ ဒါကြောင့် တက္ကသိုလ်ထက် နိမ့်တဲ့ ကောလိပ်အဆင့်၊ အင်စတီကျုစ် အဆင့်ရှိတဲ့အခြားမြို့တွေမှာသာ တက်ခွင့်ပေးပါတယ် " ဟု နည်းပညာတက္ကသိုလ်မှ ဆရာမတစ်ဦးက ပြောကြားသည်။
ယခုနှစ်တွင် အစိုးရနည်းပညာ အထက်တန်းကျောင်းမှ အောင်မြင်သည့် ကျောင်းသူ၊ ကျောင်းသား(၁၇)ဦးကို ကလေးမြို့ နည်းပညာတက္ကသိုလ်တွင် တက်ရောက်ခွင့်မပြုတော့ဘဲ မိုးညှင်း၊ ပူတာအို၊ ဟားခါး၊ ခန္တီး၊ကျောက်ပန်းတောင်း၊ ချောက်၊ ရေနံချောင်း၊ ၀ါးခယ်မ နှင့် သရက်မြို့တို့တွင်သာ တက်ရောက်ခွင့်ရှိကြောင်း သိရသည်။
ထောက်ကြန့်ရွာမှ ကျောင်းသားမိဘတစ်ဦးဖြစ်သူ ဦးမြင့်လွင်က " အစိုးရနည်းပညာ အထက်တန်းကျောင်းဟာ နည်းပညာတက္ကသိုလ်
ကျောင်းဝင်းအတွင်းမှာပဲ ရှိပါတယ်။ နည်းပညာအထက်တန်းအောင်ရင် နည်းပညာတက္ကသိုလ်မှာပဲ နီးနီးနားနားတက်ရောက်ခွင့်ရလို့ အစိုးရနည်းပညာ အထက်တန်းကျောင်းကို တက်ရောက်ခွင့်ပြုခဲ့ကြတာပါ။
အခုတော့ ဒီမှာမတက်ရတော့ဘဲ အခြားမြို့တွေမှာ သွားတက်ရမယ်လို့ ပြောပါတယ်။ " ဟုပြောကြားသည်။
မည်သည့်မြို့တွင်တက်မည်ဆိုသည်ကို နိုဝင်ဘာ(၁၃)ရက်နေ့ နောက်ဆုံးထားပြီး စာရင်းပေးပို့ခိုင်းသည့် အကြောင်းကြားစာ ပေးပို့ထားကြောင်း၊ ကလေးမြို့မှ အလှမ်းဝေးလွန်းလှသည့်မြို့များတွင်သာ တက်ရောက်ခွင့်ပြုလိုက်သည့် အတွက် ဆက်လက်ကျောင်းထားနိုင်ရေးမှာ မသေချာတော့ကြောင်း ကျောင်းသားမိဘများက ပြောသည်။
ကျော်သူစိုး(ကလေးမြို့)
Thursday, November 14, 2013
အစိုးရနည်းပညာ အထက်တန်းအောင် ကျောင်းသားများ နည်းပညာတက္ကသိုလ်တွင် တက်ရောက်ခွင့်မရ
0 comments:
Post a Comment